6050. Prinses Amalia van Oranje. (H.A.)

Je suis tres-marrie de veoir qu'il semble qu'enfin la cour de France a determiné de nous prejudicier tousjours, mesmes lorsqu'elle croid remedier a nos plaintes. J'avois esperé que si le Roy vouloit desploier sa bonté en faveur d'un homme qu'il n'en jugeroit pas digne, s'il le connoissoit, il auroit pleu a

Sa Maj.^té de se contenter de recommander son interest a la Tutele, qui aussi bien luy a promis toute faveur, dont vous pouvéz rendre de tres-veritables tesmoignages. Je vous prie de mettre tousjours peine a procurer que cette clause qui nous est si nuisible, et sans exemple, puisse estre revoquée, car je ne sçaurois encore me persuader que le Roy amateur de la justice soit bien informé de ceste affaire, ou qu'il voulust disposer de la sorte du bien et des finances particulieres d'un Prince qui n'est point son suject. C'est encore un jeune orphelin. Mais Dieu sera son protecteur. A la Haye, ce 22 Mars 1663.