5651. Aan baron Gerard5). (K.A.)

Je vous ay voulu sçavoir dans Whitehall avant que vous persecuter, quoyque j'en aye eu l'ordre avant que vous partistes, qui fut le mesme soir que j'eus l'honneur de vous entretenir chez Mad.^e la Princesse Royale, où, comme vous aurez sceu, Mad.^e la Princesse Douariere estant arrivée tost apres, je luy parlay d'abord et avec chaleur du desplaisir où je vous avoy veu, sur ce qui se seroit passé à Breda6). Souffrez, s'il vous plaist, que je vous informe

là dessus en pleine verité, Monsieur, que S.A. fut encor plus surprinse que vous ne m'aviez veu de ceste histoire, me jurant que les adresses de son envoyé n'avoyent tendu que vers la personne du Roy; que tout le reste avoit esté faict à son desceu et sans aucun ordre, et qu'elle mouroit d'envie de vous desabuser en personne de cest ombrage, comme ayant apprins que vous n'estiez point aupres de S.M.^té. En suitte de quoy m'ayant requis de vous cercher dans la presse de ceste derniere cour, le malheur voulut que vous n'y fustes plus, si mes yeux ne m'ont trompé. Le lendemain, Monsieur, S.A. me dit, que sur le point de l'embarquement elle vous en avoit touché quelque mot en passant, qui dans ce soudain embaras ne portant aucune conclusion, il luy a pleu me recommander avec beaucoup d'instance, de vous en faire ces lignes, que je vous prie de laisser servir à vous asseurer naïfvement que S.A. a tousjours et vostre amitié et vostre merite dans la mesme consideration qu'elle croid, Mons.^r, que vous avez tousjours observé en elle, en suitte de l'estime qu'elle vous prie de vous souvenir que S.A. de glorieuse memoire, son Seigneur et mari, a de tout temps en pour vous, si bien que, si elle avoit besoin de quelqu'office d'amitié en vostre cour, elle ne sçauroit à qui s'en adresser avec plus d'impression de bonne volonté en son endroict. C'est donc icy un discours, Monsieur, qui n'est pas fondé seulement sur nostre entreveuë; vous sçavez que je vous l'ay tenu tout pareil devant l'ordre que j'en ay receu ..... 17 Juin 1660.